Тений майыште Йошкар-Олаште Марий Элысе Молодёжный Парламентын кудымшо созывшын икымше заседанийже лийын. Тушто парламентын председательжылан чолга еҥ Алексей Тришковым сайлыме. Алексей Романович дене палыме лийме, Молодёжный Парламентын ыштышаш пашаж нерген мутланыме.
Йочаж годсек чолга
Звенигово олаште шочын-кушшо А.Тришков Молодёжный Парламентын пашашкыже эше школышто тунеммыж годымак ушнен. Эн ончыч волонтёр лийын. 2015 ийыште школышто Кугу Отечественный сарыште сеҥымылан 70 ий теммылан пӧлеклалтше «Шарнымаш сорта» акцийым эртараш полшен. Лачак тиддеч вара волонтёр движенийыш толын.
Звенигово оласе Самырык тукым дене паша шотышто специалист-шамыч дене мутланен да нуно чолга рвезылан «Технологии добра» платформышто регистрацийым эрташ да тушто волонтёр книжкам налаш темленыт. Тыге волонтёр паша самырык рвезым молодёжный мер политике аланыш конден. Алексей каласкала:
– 2017 ий январьыште Провой кундемыште «Сеҥымаш волонтёр» Российысе толкынын пӧлкаже ышталтын. Тушко районысо вуйлатышылан мыйым сайленыт. Тунам 8-ше классыште тунемынам. Ответственность, нелылык деч лӱдын омыл. Район кӱкшытыштӧ ятыр патриотический мероприятийым эртаренна, акцийлаште, форумышто участвоватленна, толкынын регионысо пӧлкаж дене кылым ыштенна, шукылан тунемынна. А 2021 ийыште «Сеҥымаш волонтёр» толкынын регионысо пӧлкажым вуйлаташ ӱшаненыт. Но тиде пашам мый пе лий веле шуктенам – жапем Молодёжный Парламентлан утларак ойыраш тӱҥалынам.
Самырык председатель
А.Тришков – 2018 ий годсек Молодёжный Парламентыште. Эн ончыч районысо парламентын 3-шо созывышкыже сайлалтын. А 4-ше созывын заседанийыштыже тудым председательлан ойыреныт, тидын годым Республикысе Молодёжный Парламентын 4-ше созывын составышкыже пурталтын.
– 4-ше созыв деч вара парламент паша деч изишлан кораҥынам. Амалже – МарГУ-што юридический факультетын студентше лийынам, тунеммашлан шуко жапым ойыренам. Но мер паша мыйым «колтен» огыл. Университетын тунемшыже-влак советым вуйлаташ ӱшаненыт. Тидлан кӧра Кугыжаныш Думо пеленысе Молодёжный Парламентыш мыйым ойыреныт. 2024 ий сентябрьыште тушто самылем мучашлалтын. 2024 ий февралыыште Марий Элысе Молодёжный парламентын 5-ше созывышкыже сайлалтынам да председательын алмаштышыже лийынам. А тений Кугыжаныш Погынын председательже Михаил Зиновьевич Васютин Молодёжный Парламентын 6-шо созывын председательжылан шогалташ кандидатурем темлен. Тидлан иктат тореш лийын огыл, – палдарыш А.Тришков.
Кугыжаныш Погын дене пырля
Парламентын 6-шо созывын икымше заседанийже деч вара председатель Михаил Васютин дене вашлийын. Нуно ончыкылык паша план, Кугыжаныш Погын дене кылым ыштыме нерген мутланеныт.
– Михаил Зиновьевичын позицийже: Молодёжный Парламент законотворческий инициативе могырым пашам ыштышаш. Ӱмаште декабрьыште Кугыжаныш Погынын пеҥгыдемдыме почеш, парламент тӱрлӧ йодыш дене шке законодательный инициативым темлен кертеш. Каласыман, Российысе чыла огыл регионышто, эсогыл Юл кундем федеральный округышто, Молодёжный Парламентын тыгай праваже уло.
Июльышто эртаралтше Кугыжаныш Погынын сессийыштыже Молодёжный Парламентын еҥже-влак кум инициативым ончаш темлена: Патриотический воспитаний шотышто законын чыла могырым саемдыме проектше, парламентын положенийышкыже вашталтыш да Молодёжный Парламентын членже-влакын оҥыш пижыктыме знак шотышто нормо нерген положений.
Тӱрлӧ аланыште тыршат
Молодёжный Парламентым кадрым ямдылымаште апшаткудылан шотлат. Тудын членже-влак шукынжо муниципальный кучемысе органлаш, районысо администрацийлаш пашаш каят, депутат-влакын полышкалышышт лийыт. Мутлан, парламентын 5-ше созывшын кум еҥже кызыт депутат улыт. Алексей Романович илыш тӱрлӧ шӧрынан, могай векыла савыралеш от пале, манеш, садлан ончылгоч кушко пашаш каяш ойлаш ок тошт. Парламентын председательже деч посна тудо юриспруденций дене магистратурын икымше курсын студентше.
– Марий Элысе Молодёжный Парламентын 6-шо созывыштыже чылаже – 40 еҥ. 10 еҥ – политический партий-влакын представительышт, 13 член – мер организаций-влакын еҥышт, да 17 еҥ – тӱрлӧ район ден олан представительышт. Вич ий жапыште, лачак тынарлан ме сайлалтме, пашам кыртмен ыштышаш, калыклан пайдам кондышаш улына. Парламент пелен тӱрлӧ направлений дене куд комитет уло. Кажне комитетыште вуйын шогышо еҥым ойырымо, – ойла самырык председатель.
Ончыкшым парламент СМИ дене кылым утларак пеҥгыдемдынеже, шке медиаслужбым ышташ шонат. Тылеч посна парламент национальный политике да культур кокласе вашкыл йодышлан кугу тӱткышым ойыра. Тидын шотышто лӱмын посна комитет ышталтын. Пытартыш ийлаште кундемыштына тӱрлӧ эл гыч толшо ӱдыр-рвезе-влак ешаралтыныт. Чылан пырля, ваш пагален, умылен илышт манын, парламент тӱрлӧ мероприятийым эртараш, проект-влакым илышыш пурташ ямдылалтеш.
А.Тришковын альбомжо гыч налме фото.