У вий дене – у пашаш

 

М.Шкетан лӱмеш Марий драмтеатрын артистше-влак каныш деч вара пашашке 3 августышто лектыныт. Тыште у тургымым октябрьыште почаш палемдыме.

Ончышо-влакым шушаш театр тургымышто могай у паша-влак дене куандарат? Тиде йодышлан вашмутым театрын художественный вуйлатышыже, режиссёр Василий Пектеев пуыш:

– У тургым оҥай лийшаш. Кызыт репетиций-влак эртаралтыт. Теве Шекспирын пьесыж почеш «Гамлет» спектакль ямдылалтеш. Тудым режиссёр Степан Пектеев шында. Тыгодымак кудымшо пачашысе экспериментальный залыште ончыкташ манын, Василий Домрачев «Посадить дерево» спектакльым рушла шында.

12 сентябрьыште ме Грозный олаште Российысе Национальный театр-влакын фестивальыштышт «Путёвка в жизнь. Йыван Кырла» спектакльым ончыктена. Тушечын артист-влак Уфашке вигак чоҥештат. Туштат «Йыван Кырла» да «Пампалче» спектакль-влакым модына. А вара Нефтекамск олашке, Калтаса ден Мишкан райрӱдылашке изирак гастроль дене миен толына.

В.А.Пектеев вуйлатыше семын кодшо тургым мучаште у премьер-влак нерген иктешлен каласкалыш. Эн ончычак Н.Гогольын «Ревизор» пьесыж почеш май-апрельыште ончыкталтше «Тергыше» спектакль сай шарнымашым коден мане. Туддене актёр-влак сценыш улыжат кок гана лектын шуктышт гынат, зрительым Сергей Даниловын тӱҥ геройым, Хлестаковым, модмыжо ӧрыктарен; Городничийым Иван Смирнов, тудын ватыжым Светлана Сандакова, ӱдыржым Светлана Александрова чотак келыштареныт.

Шекспирын произведенийже почеш «Торешвате» комедийым да «Югорно» эпосын авторжо Анатолий Мокеевын пьесыж почеш «Ой, Мичу!.. Ой, Зина!..» спектакльым шагал гана ончыктышт. Нунымат тений ужына.

Умбакыже — «Кугарня» газетын 12-шо августысо номерыштыже лудса.

Эльвира Терентьеван фотожо.