Ялысе калыкын, поснак кугурак ийготан еҥ-влакын, тӱвыра пӧртышкӧ мияш кумылышт утларак лийже манын, ме, тӱвыра пашаеҥ-шамыч, чот тыршена. Тачысе кечын кажне тӱвыра пӧрт у тургымлан ямдылалтеш, тудо 1 октябрьыште почылтеш.
Морко кундемыште паша шолеш. Клуб ончылым сӧрастарена. А тӱвыра пӧртын фойэштыже кажне кок ийлан ик гана у вашталтыш лийшашак. Теве Кораксола тӱвыра пӧртыштынат шке вий дене мом-гынат ышташ тыршена, олмыктымо пашалан шке оксам кучылтына.
Кораксола клубышко у вашталтышым пурташ мемнан «Муро кумыл» фольклор ансамбльнан пел ий жап тӱрлӧ яллашке концерт дене коштмо окса кугу шӱкалтышым ыштыш. Икымше пачашыште чыла окнаште тюльым алмаштышна, фойэште стенд-влакым уэмдышна.
У вашталтышым ужын, ялысе калыкын кумылжо нӧлталтше манын, шукерте огыл марий касым эртарен колтышна. Еҥ-влак ятырынак чумыргеныт. Нуным тӱрлӧ таҥасымаш да концерт дене куандаренна.
Елена Григорьева, Кораксола тӱвыра пӧрт вуйлатыше.
Снимкыште: Тӱвыра пӧртна у тургымлан ямдылалтеш; Марий касыш чумыргышо-влак.
