Йошкар-Оласе 32-шо номеран школышто образований аланыште тыршыше-шамычын республик кӱкшытан Августысо форумышт лийын. Тушто регионысо образований системын кушмыжо да эртыше тунемме идалыкын лектышыже нерген палдареныт.
Форумышто Марий Элым Вуйлатыше Юрий Зайцев лийын. Тудо туныктышо-шамычым саламлен да ойыртемалтшыже-влаклан наградым кучыктен. Мероприятийыште республикысе образованийын ончыкылыкшо нерген каҥашеныт. Тидлан у тунемме идалыклан могай задачым да цельым шындыме палдареныт. Участник-влаклан тыгак «Образование будущего: погружение в новые горизонты» иммерсивный ончерым ончыктеныт. Тушто туныктышо-шамычлан у туныктымо тенденций, инновационный цифровой инструмент, искусственный интеллект да виртуальный полышкалышылан кузе эҥерташ лиеш палдареныт. Тыгак тунемше-шамычын пашам ышташ кумылаҥдыше проектышт нерген каласкаленыт. Варажым туныктышо-влак тематический секций-шамычлан шелалтын, образований аланыште тургыжландарыше йодыш-влакым лончыленыт.
Ты форум деч вара районлаште туныктышо-шамычын конференцийышт эртаралтыныт.