Марий Элысе куд школым икымше сентябрь марте сайын да тичмашын (капитально) олмыктат. Тиде сомыл «Модернизация школьных систем образования» проект почеш ышталтеш.
2023 ийыште олмыктымо паша эше 13 туныктымо тӧнежыште лиеш. «Образование» нацпроект почеш у тунемме ийлан «Точка роста» шинчымашым пуышо 22 рӱдер почылтеш.
Тыгак «IT-куб» цифровой шинчымаш рӱдер, йоча-влаклан ешартыш шинчымашым пуышо 1,5 тӱжем вер, ончыкылык профессийлан ямдылыше рӱдер, кызытсе жаплан келыштаралтше латик мастаргудо пашам ышташ тӱҥалыт. Тыгак ныл ялысе школышто спортзалым шотыш кондат.
Национальный проект почеш 2022 ийыште у шинчымашым пуышо 200 утла объект да ешартыш шинчымашым налаш кум тӱжем наре вер лектын.
