У Торъял районысо Немда кундемыште 9 апрельыште А.Л.Пузырников лӱмеш II шахмат турнир эртен. Таҥасымаште чылаже шахматла модаш йӧратыше 18 еҥ шке вийжым терген.
Эн виян семын У Торъял гыч Виктор Косоротов ойыртемалтын, кокымшо верыш Анатолий Сидоркин (Кугу Лумарий) лектын, кумшо верыш — Иван Смирнов (Кугу Пызак).
‒ Сеҥышылан кубок ден медальым пуэнна, пӧлекым кучыктенна. Тугеже таҥасымаш кужу жаплан шарнымашеш кодеш, ‒ палдара таҥасымашын ик организаторжо, У Торъял кундемын шукылан палыме чолгаеҥже, Марий калык конгрессын еҥже Николай Сидоркин.
А.Л.Пузырников тале пашаеҥ, лӱмлӧ айдемелийын, районысо «Толмань» озанлыкым вуйлатен. Ила гын, 9 апрельыште 72 ийым темышаш ыле, но илыш корныжо кӱчыкырак лийын.
