
Российыште Кугу Отечественный сарыште сеҥымылан 80 ий темме вашеш «Патриот» телеканал пашам ышташ тӱҥалын.
Тудым «Цифровой телевидений» медиахолдинг почын, увертара ТАСС. Каналыште Шочмо элым аралыме идалык дене кылдалтше темым авалтат. Тыгак сеҥымаш, еш поянлык да калык йӱла нерген художественный фильм ден сериал-влакым ончыктат. Тушто совет жапысе тыгай фильм-влакым ончыкташ палемдыме: «Пришел солдат с фронта», «Баллада о солдате», «Сорок первый», «Бабье царство», «Они сражались за Родину», «Летят журавли» да молымат.