Марий Элым Вуйлатыше Ю.Зайцев республикысе Правительствын еҥже-влак да «Сбербанк» ПАО-н Марий Элысе отделенийже дене пырля дизайн сессийым эртарен. Тушко кундемнан чыла гаяк министерствыже да район-влакын вуйлатышышт ушненыт.
Сессий годым искусственный интеллектын илышыш шыҥдаралтмыж нерген ойленыт. Ю.Зайцевын палемдымыж почеш, тудо экономикын, социальный илышын, кугыжаныш управлений системын чыла гаяк йыжыҥжым авалтышаш.
«Искусственный интеллектлан технологийым вияҥдымаш, нуным кугыжаныш управленийын, экономикын тӱрлӧ йыжыҥыштыже кучылтмаш кызыт ик эн тӱҥ задачылан шотлалтеш. Нуныжо элнан эн кугу шонымашыже-влакым 2030 ий марте илышыш шыҥдараш полшен кертыт. Кызыт искусственный интеллектлан кӧра медициныште, логистикыште, тунеммаште, еҥ-влакын лӱдыкшыдымылыкыштым аралымаште, ушан приложений-влакым ыштымаште, виртуальный илышыште ончык кугу ошкылым ужына», – манын тудо. Тыгак палемден, искусственный интеллектлан кӧра тӱрлӧ йодышым писын да жапыштыже решатлаш лиеш.
«Сбербанк» ПАО-н управляющийже М.Бауков, у технологий-влакын илышыш шыҥдаралтмышт элнан экономикыжлан кугу пайдам конден кертмыж нерген ойлен. Тидланже нунын ты сферыште паша опытышт изижак огыл, технологический базыштак кугу манын. Садлан искусственный интеллектым илышыш шыҥдарымаште «Сбербанк» Марий Элысе Правительстве дене пырля пашам виктараш ямде манын пеҥгыдемден. А сессийыште вашлиймаш регионын экономикыжым вияҥдымылан кугу шӱкалтышым ыштен.