Марий Эллан 100 ий темме лӱмеш Йошкар-Олаште у скверым ыштат. Тудо Йыван Кырла уремыште «Планета» ужалыше рӱдер деч тораште огыл лиеш. Кызыт тудо парк гай.
Тений «Жилье и городская среда» нацпроект почеш объектын проектшым ямдылат, а вес ийын тӱзатыме пашам тӱҥалыт.
Кумдыкым ончал савырнымыж годым Марий Эл вуйлатыше А.Евстифеев палемден: «Тыште кызыт тысе пушеҥге коклаште каналтен, ласкан шӱлалтен эрташ сай, но шинчын канаш вер уке. Тораште огыл черке, ужалыше рӱдер уло, тугеже еҥ-влак тыште коштыт. Сандене ончыкылык скверыште пушеҥге-влакым арален кодаш кӱлеш».
Тыгай уверат шокта: скверлан икымше марий газетым лукташ тӱҥалше просветитель П.Глезденёвын лӱмжым пуаш шонат.