«Звезда» Россий телеканалыште «Новая Звезда» усталык проект тӱҥалын. Тиде конкурсыш кумда элнан чыла регионжо гыч участник-влак ушненыт. Марий Элын чапшым Йошкар-Олаште илыше 25 ияш Ида Сингер (Топорова) арала.
«Тиде корныш авам шогалтен. Школышто тунемме жапыште эре муренам. Кӱшыл шинчымашым вокал дене налынам. Вузышто тунеммем годым ончыкылык пелашем дене палыме лийынам. Кок йоча шочмеке, икмыняр жаплан мурымым чарненам. Кызыт икшывем-влак изиш кушкыныт, сандене йӧратыме сомылемлан шукырак жапым ойырен кертам», – тыгерак передачыште шкеж дене палдарен Ида Сингер.