Селаште илыше Российысе молодёжь ушемын Марий Элысе пӧлкажым ынде Татарстан Республикысе Зеленодольск олаште медицине училищыште медсестралан тунемше, Юлсер кундемын ӱдыржӧ, 18 ияш Виолетта Трепова вуйлаташ тӱҥалеш.
Тыгай ушемыште тудо кум ий утла волонтёр пашам шукта да чолгалыкым эре ончыкта. Тиде жапыште ӱдыр шуко акцийыште да мероприятийыште шкенжым терген. Селасе самырык-влаклан пӧлеклалтше, «Шӧртньӧ шыже – 2022» форумлаште да моло вере мастарлыкшым ончыктен.
В.Трепован мутшо почеш, волонтёр паша тудлан эре келшен. Еҥ-влаклан полшаш манын, ӱдыр медсестралан тунемаш пурен. Кызытат тудо волонтёр-медик семын тырша да медицине аланыште полышым пуымо мероприятийлаш кумылын ушна.