3 ноябрьыште Марий Элым Вуйлатыше Культурный инициативе президент фондын директоржо Р.Карманов дене пырля пашам ыштыме шотышто ойпидышым ыштеныт. Варажым нуно Национальный тӱвыра пӧртын икымше пачашыштыже Креативно-образовательный рӱдерым да проектный офисым почыныт.
Январьыште ты пӧртым капитально олмыкташ 29 млн утла теҥгем ойырымо. Пашан акше 24,4 млн теҥгеш шуын. Кызыт 2,2 млн теҥгеаш офис мебельым налшаш улыт. Кабинетлаште да коридорышто, звукозапись ден гардеробышто кӱварым вашталтыме, санузелым, омсам уэмдыме, электромонтаж сомылым шуктымо, уремыште да стоянкыште асфальтым шарыме.
Кокымшо пачашыште усталык коллектив-влакын паша кабинетышт верлана. Кок куштымаш зал уло. А кумшо пачашыште тӱвыра да мер ушем-влак лийыт.
Ты кечынак тысе конференц-залыште Запорожский областьысе Куйбышевский район гыч толшо тӱвыра пашаеҥ-влаклан семинар эртаралтын.
Проектный офисын пашаже – тӱрлӧ организацийлан грантым налаш полшаш. Ты шотышто мероприятийым, мониторингым, иктешлымашым эртараш тӱҥалыт.