Йошкар-Олаште верланыше Столичный бизнес колледжыште «Любящий родитель» клубым чумырымо нерген возенна ыле. Тушто педагог ден студент-влак начар тазалыкан йочам куштышо ешла дене пашам ыштыме опытым погеныт да у проектлан кӱын шуыныт. Тений ты колледжыште «Мамина школа» проект почеш пашам вораҥдараш тӱҥалме.
– Кодшо пашанат, кызытсыжат начар тазалыкан ава-шамычлан полыш семын палемдалтын. Тудым кум направлений дене виктарена. Эн ончычак ава-шамыч дене психолог-шамыч пашам ыштат, кумылыштым, эмоцийыштым рашемдат да ой-каҥашым пуат. Тыгак ава-шамычлан капкылыштым шуарыме фитнес-занятий-шамыч лийыныт. Кумшыжо – йоча-шамычыштым волонтёр-влак модыктеныт.
Ава-влак дене занятийла годым могай нелылык дене вашлиялтмыштым рашемденна. Тунам тӱрлӧ врач шотышто йодыш лекмым, массажлан, лечебный гимнастикылан ешыште окса шуко кӱлмым пален налынна да у грант почеш ава-влакым иктаж сомыллан туныкташ тӱҥалаш палемденна. Тений ава-влак гигиенический массажын негызшым пален налыт да лечебный физкультур курсым эртат. Кумшо направленийлан адакат психолог дене пашам ыштымым ойырен налынна, молан манаш гын ава-влакын психологий могырым состоянийыштым саемдыман. Вет южо ешыште кок инвалид йоча уло, а южышто икшывым ава шкетын ончен кушта, – каласкалыш психолог О.В.Калмыкова.
Ава-влак икте-весышт дене мутланат, тыгодым кӱлешан уверым пален налыт, вашла ой-каҥашым пуат. Нуно у проектым илышыш шыҥдараш тӱҥалмылан путырак куаненыт. Начар тазалыкан йоча-влак дене вашлиймашым икшыве ден волонтёр-влакат вучат. Шукышт йолташым муыныт, икте-весышт дене телефон дене мутланат да унала коштыт.
У проект почеш пашашке ончычсо семынак 15 ешым ушаш шонат. Сентябрьыште массажлан оборудованийым налыт, специалист-влак дене договорым ыштат, волонтёр-влакым туныктат, а занятий-шамыч октябрьыште тӱҥалыт.
Проектын кураторжо О.В.Баланчукын мутшо почеш, ты паша шым тылзе шуйна. Ава-влак шке икшывышт дене кажне шуматкечын кок шагатлан Столичный бизнес колледжыш толыт. Проектын задачыже – илышыште кӱлешан у шинчымашым пуаш. Участник-влак массажым тунемме шотышто документым налыт. А студент-влак волонтёр семын сай илыш опытым погат. Ты командыште 20 наре студент уло. Нуно, икте-весыштым вашталтен, ты мероприятийыште участвоватлаш тӱҥалыт.
Чынжымак, ты тунемме верыште сай корным ойырен налме. Вет начар тазалыкан икшыве-влаклан ятыр мероприятий эртаралтеш, а нуным ончен куштышо, шке жапшым шочшыжлан пӧлеклен илыше авалан тыгай полышым ыштымым шуэн вашлият.