Шукерте огыл Москошто уш-акылым пойдарыме «Знание. Первые» федеральный марафон эртаралтын. Тушко Марий Эл гычат студент ден туныктышо ушненыт. Ты марафон, тудын кӱлешлыкше нерген чолга рвезе Вадим Елькин дене мутланышна.
Сеҥымаш нерген…
«Знание. Первые» федеральный марафон – тиде самырык-влак да элнан вӱдышӧ специалист, учёный, спортсмен, эстраде шӱдыр, кугыжаныш пашаеҥ-влак дене тӱрлӧ йодышым каҥашыме мероприятий. Тудо тений Кугу Ачамланде сарыште Сеҥымылан 80 ий теммылан пӧлеклалтын. Марафон годым тӱрлӧ лекций, мастер-класс, бизнес-модыш, VR-технологий эртаралтыныт. Тыге, у йӧным кучылтын, самырык тукымлан Кугу Ачамланде сар нерген шинчымашым пуэныт.
– Январь мучаште мыланем Марий Эл делегаций дене пырля марафоныш каяш темленыт. Мый вигак келшенам, вет тиде – Москошко миен толаш, икоян еҥ-влак дене палыме лияш, шкем вияҥдаш сай йӧн. Тушко логалаш манын, анкетым возаш да шке нерген уверым пуаш кӱлын, платформышто регистрацийым эртымек, корныш лекташ пеҥгыдемдымашым вучыман.
Марафон годым Кугу Ачамланде сарым шарнымылан, патриотизм шӱлышым куштымылан пӧлеклалтше лекций-влакым политик, учёный да йотэлласе эксперт-влак лудыныт. Мутлан, Самырык-влакын пашашт шотышто федеральный агентствым вуйлатыше Григорий Гуров Кугу Ачамланде сар ийлаште кугыеҥ-влак веле огыл, йоча-шамычат подвигым ыштеныт манын ушештарен. Театр да киноактёр Игорь Петренко киношто сар ийласе геройыш савырнымаш, чын историйын кӱлешлыкшым каҥашен.
Марафонышто тыгак Российын Геройжо-влак Андрей Митяшин, Владислав Головин да Артур Орлов дене вашлиймаш моткоч кумылаҥден. Нуно тыглай мут дене тыныс илышын акше, эл верч пеҥгыдын шогымышт нерген каласкаленыт, а тиде кызытсе саманлан моткоч келшен толеш.
Марафонлан кӧра патриотический воспитаний технологий нерген шуко ум пален налынам да тиде опытым пашаштем умбакыже кучылташ шонем, – каласкала студент.
Ончыкылык психолог
В.Елькин МарГУ-што кокымшо ий «Психологий» направлений дене тунемеш.
– Ондак мый Йошкар-Оласе медицине колледжым йошкар диплом дене тунем пытаренам, но ты жапыште психологий мыланем утларак лишыл улмым умыленам. Сандене айдемын психикыжым келгынрак умылаш да еҥ-влаклан полшаш вузышто шинчымашым погем.
Тунеммем годым шанче пашалан кугу тӱткышым ойырем. Тӱрлӧ конференцийыш ушнем, статьям савыктем, проект пашам шуктем.
Кызыт педагогике науко кандидат, доцент С.А.Домрачеван вуйлатымыж почеш «Обучение служением» дисциплине дене келшышын, «Ӱшанаш жап: подростко-влакын социальный адаптацийыштышт полыш» проектым вуйлатем. Проект йоча-влаклан школ коллектив деке тунем шуаш полшаш виктаралтын. Тыге ме тунемше-влаклан икоян лияш тренингым эртарена, мутланыме навыкыштым вияҥдена да йолташ-влакым муаш полшена, – палдара В.Елькин.
Тунем пытарымек, Вадим психолог–консультантлан пашам ыштынеже, кызыт Йошкар-Оласе Молодёжный парламентыште законодательстве да самырык-влакын праваштым аралыме шотышто комиссийын председательын сомылжым шукта. Рвезе комиссий дене пырля у проект-влакым ямдыла да илышыш шыҥдара.