Марий Элым Вуйлатыше Ю.Зайцев Волжск олаште да Памар селаште аварийный пӧртла гыч илаш кусарыме еҥ-влаклан, тыгак тулык, ача-ава ончымо деч посна кодшо ӱдыр-рвезе-шамычлан у пачер деч сравочым кучыктен.
Шукерте огыл Волжск олаште индеш пачашан пӧртым чоҥен шуктеныт, тушто 53 пачерым аварийный пӧртла гыч еҥ-влакым илаш кусарыме программылан ойыреныт.
Пачер-влакын тичмаш акышт – 150,8 млн теҥге, тушеч 147 млн теҥгем ЖКХ реформированийлан полшышо фонд гыч ойырымо.
22 пачерыш тулык, ача-ава ончымо деч посна кодшо йоча-влак тений илаш куснат. Ты категорийлан ойырымо пачер-влакын тичмаш акышт – 35 млн наре теҥге.
– Тачысе кечылан 83 тӱжем наре квадратный метр кумдык аварийный илыме верла гыч еҥ-влакым кусарыме. Тидыже палемдыме планын 82 процентше лиеш. 5,5 тӱжем еҥ у илыме верыш илаш куснен. Программе почеш чылаже 6897 еҥ у верыш илаш куснышаш. Тений идалык мучаш марте 9 муниципальный образованийыште шуко пачеран 11 пӧртым чоҥен шуктышаш улыт. 2017 ий 1 январь марте аварийныйлан шотлымо пӧртлаште илыше еҥ-влакым тений вес вере илаш кусарыме сомылым мучашлаш шонена, – ойлен Ю.Зайцев.
Волжский район Памар селаштат 18 тулык йоча у илыме верыш илаш куснаш ямдылалтеш. Ю.Зайцевын палемдымыж почеш, республикыште 2019-2022 ийлаште да 2023 ийын икымше пелийыштыже 956 тулык йочалан илыме верым пуымо. Тиде пашам умбакыжат шуят.
Д.Речкинын фотожо.