Марий Элысе Спорт министерствын ВК-се тӱшкаштыже вашталтыш, палемдат ты тӱшкам вӱдышӧ админ-влак. Шукерте огыл ты тӱшкаште у логотипым вераҥдыме.
У логотипын дизайнже тыглай огыл, тудо регионысо спортым вияҥдыме шотышто икмыняр символым иктыш ушышылан шотлалтеш. Тушто кызытсе спортын ончыко кайымыже да регионысо йӱлам жаплыме ончыкталтеш. Дизайнын тӱҥжылан «М» буквам ойырымо. Тидыже марий тӱрын моторлыкшым жаплыме нерген ойла. «С» буква спорт мут дене кылдалтын. Кок букван иктыш ушнымышт олимпийский коркам почын ончыкта. Тудын кӧргыштыжӧ пуйто тул йӱла. Тидыже сеҥымашке шуаш тыршымашым ончыкта.
Ты вашталтыш республикысе спортым у шӱлыш дене вияҥдаш тӱҥалме нерген палемда. Вет ончыкылыклан кугу планым чоҥымо. Садлан Марий Элысе спортлан вияҥаш, тӱзланаш да у сеҥымаш-влак дене пойдаралташ!