Марий Элым Вуйлатыше Ю.Зайцев Россий Правительстве Председательын алмаштышыже М.Хуснуллинын вуйлатыме совещанийышкыже видеоконференций йӧн дене ушнен.
Тушто ДНР, ЛНР, Херсон да Запорожский областьлам угыч нӧлтымӧ йодышым каҥашеныт.
Марий Эл Запорожьесе шефыш налме Куйбышевский районлан умбакыжат полша. 2024 ийыште ты пашалан 138 млн утла теҥгем ойырымо. 2024 ийыште вӱдым пуымо системым ышташ, здравоохранений ден МФЦ объект-влакым чоҥаш палемдыме. Тыгак нуным шукташ спецтехникым, стройматериалым, шӱрымӧ-ӱйлымӧ материалым налыт.
Тылеч посна шеф полыш семын калыклан йӱшаш вӱдым, книгагудо-шамычлан книгам, школ ден йочасад-влаклан кӱмыж-совлам налын пуымо. Майыште тушко врач-влак кайышаш улыт. Кодшо ийын лач ты тылзын Куйбышевский район дене ойпидышым ыштыме. Тудын дене келшышын, Марий Элысе строитель-влак школым, йочасадым, эмлымверым чоҥат. Республик гыч гуманитарный полышым колтен шогат. А тусо йоча-шамычлан санаторийлаште каныме сменым эртарат.
Эльвира Терентьева.