Йотэлла гыч тунемаш толшо ӱдыр-рвезе-влак Марий кундемыште шагалын огытыл. Кок ий ончыч самырык рвезе Габрэиль Юссеф, шочмо Египетшым коден, Йошкар-Олаш МарГУ-ш шинчымашым погаш куснен.
Муро аланыште
Г.Юссеф – усталык шӱлышан рвезе. Тудо 14 ияшыж годым мурылан шӱмаҥын. 16 ийым темымек, тӱрлӧ конкурсыш ушнаш тӱҥалын. Габрэильлан утларак джаз жанрыште мураш келша, южгунам эстрадный мурымат йоҥгалтара. Ондак англичан да араб мурым гына ойырен налеш ыле гын, Российыш толмек, руш мурылан шӱмаҥын.
– Икана Йошкар-Олаште самырык-влаклан полатыш концертыш миенам. Тушто мурызо-влакым шекланенам да шкемынат мураш кумыл лектын. Кодшо ийын университетыштына эртаралтше «Голос юности» конкурс-фестиваль нерген пален налынам. Ойырен налме этапым эртымек, «Арабская ночь» руш мурым муренам да «Мужской голос» номинацийыште икымше вер дене палемдалтынам.
Тений ты фестивальыш угыч ушненам. Кызыт ме репетицийым эртарена, кок арня гыч выступатлаш тӱҥалына. Концерт программына Кугу Ачамланде сарыште Сеҥымашлан 80 ий темме дене кылдалтын, сандене патриотизм шӱлышан мурым ойырен налынна. Тиде – «Смуглянка», «Первым делом самолёты», – палдара рвезе.
Февральыште рвезе «Шанс-2025» XI Всероссийский фестиваль-конкурсышто мастарлыкшым терген. Тудо кок категорийыште: «Поп» да «Джазовый вокал» – таҥасен. «Поп» категорийыште «Feeling good» мурым мурен да сеҥышыш лектын, а «Джазовый вокалыште» «That’s life» муро дене кумшо верым налын.
Медицине лишыл
Г.Юссеф кум шочшан ешыште шочын-кушкын. Аваже Мансур оласе поликлиникыште кугурак медшӱжарлан ышта, шольо ден шӱжарже школышто шинчымашым погат. Рвезе, аважым ончен, медицине пашалан шӱмаҥын. Йолташыже-влакын темлымышт почеш Марий Элыш тунемаш толын.
– Шочмо олаштем Мансур университет уло. Тудо медицине факультетше дене уло Египетлан палыме. Но тушко тунемаш пураш моткоч неле, сандене вес йӧным кычалаш кӱлын. Йолташем-влак Марий кугыжаныш университетыште шинчымашым погеныт, сандене мыланемат тышке толаш темленыт. Авам вес элыш тунемаш кайымемлан тореш лийын огыл.
Ондак мый руш йылмым тунемме шотышто подготовительный отделенийыш коштынам. Тушто Египет, Иран, Афганистан, Музамбик (Африке) кундемла гыч ӱдыр-рвезе-влак шуаралтыныт. Куд тылзыште у йылмылан тунем шуынна.
Медицине институтышто мый «Лечебное дело» направленийым ойырен налынам. Вигак палемдыман, тунемаш куштылго огыл. 8 шагат эр гыч 8 шагат кас марте лекций-влак каят, тылеч посна шке гыч шуко ямдылалтат. Но тунемаш шонет гын, чыла нелылыкым сеҥаш лиеш, – палдара студент.
Яра жапыште рвезе пашамат ыштен шукта. Кажне кечын 3-4 шагат жапыште кочкыш сатум велосипед дене кӱлеш верыш коштыкта.
Шочмо тӱвыражым пагала
Египетыште кеҥежым чот шокшо (30-40 градус), телым юалгырак. Сандене Габриэльым у кундемын игечыже ондак ӧрыктарен, но рвезе кок ий жапыште тунем шуын. Сандене шкенжым тыште ынде ласкан шижеш.
– Мый христианин улам. Сандене черкыш коштам, христиан пайремымат пайремлем. Мыйын элыштемат моткоч шуко да ойыртемалтше пайрем-влак улыт. Ик эн кугу – Египетын кечыже (23 июль). Тиде кечын 1952 ийыште революций лийын, тудын годым монархийым сӱмыреныт да республикым ыштеныт. Тыгак У ийым, Аван кечыжым,Жам эн-Нессим (шошо да ялозанлык пашам тӱҥалме пайрем), Египетын Вооруженный Вийжын кечыжым пайремлат.
Пайрем годым муро да куштымаш концерт-влакым ончыктат. Тушто илымем годым мыят выступатлаш ушнем ыле, – ойла студент.
Г.Юссеф эше кокымшо курсышто гына тунемеш. Сандене Марий кундемыште эше ятыр жап илаш тӱҥалеш. Тидын годым ала марла мурашат кумылаҥеш?