Россий Федерацийысе регион-влакым вияҥдыме шотышто Правительственный комиссийын заседанийыштыже нацпроект-влакым илышыш шыҥдарыме да корным чоҥымо пашам шуктымо нерген каҥашыме. Тудым вице-премьер М.Хуснуллин вуйлатен.
2024 ий 9 тылзыште Марий Элыште «Жильё» нацпроект почеш 355,9 тӱжем квадратный метр илыме верым чоҥымо. Тышеч 114,9 тӱжем кв. метрже шуко пачашан пӧрт-влак улыт, а 240,9 кв. метр – посна пӧрт-шамыч. Идалык мучаш марте 478 кв. метр илыме кумдыкым чоҥышаш улыт.
«Безопасные качественные дороги» нацпроект почеш 2024 ийыште региональный да межмуниципальный 44,7 процент корным (1363,3 км) нормо почеш шотыш кондат. Чылаже 203,2 км корно сетьым да опорный сетьысе региональный корнын 210,8 км кужытшым нормылан келыштараш планым ыштыме.
Заседанийыште 2025 ийыште тӱҥалшаш «Инфраструктура для жизни» у нацпроектлан ямдылалтме нергенат йодышым ончен лекме. Марий Эл у нацпроектын 9 федеральный программыжым илышыш шыҥдараш шона. Тудын почеш вӱд снабжений системе ден вӱдпуч сетьым, Йошкар-Олаште набережныйым уэмдышаш, у кугорным ыштышаш улыт. Тылеч посна общественный транспортым ешараш, еҥ-влакым тошто пӧртла гыч кусараш да мероприятийымат эртараш палемдыме.