У корпус чоҥалтеш  

 

Республикым социально-экономически вияҥдыме индивидуальный  программе почеш ветлабораторийын корпусшым чоҥаш тӱҥалме. Тидын нерген Правительстве пӧртыштӧ эртарыме совещанийыште мутланеныт.

Кызыт Йошкар-Оласе Машиностроитель уремысе 119-ше пӧртыштӧ верланыше ветлабораторий воктене у объектым нӧлташ верым ямдылат. Тушто геодезический строительный сеткым ыштыме, свайым шогалтыме.

Республикысе ветеринарий комитетын председательже В.Вавилован мутшо почеш, ветлабораторийын кызытсе корпусшым 1965 ийыште чоҥымо. Тудо у йодмашлан келшен огеш тол: шымлымашым эртараш пӧлем огеш сите, оралтыжат тоштемын, у оборудований-влакым вераҥдашат йӧн уке. Но тыгодым шымлымаш кажне ийын ешаралтеш. Теве ондак идалыкыште 400 шымлымашым ыштыме гын, кызыт 1100 деч шагал огыл. Специалист-влак кочкышын качествыжым тергат, ветеринарно-профилактический, эмлыме да моло ветеринар услугым пуат.

ТЫГОДЫМАК!

Совещанийыште у лабораторный корпуслан техникым налме йодышым ончен лекме. Тидлан 88 млн теҥге утла окса кӱлеш манын палемдыме. Объектым чоҥымо паша 126 млн утла теҥгешке шуэш. У корпус йотэллашке колтымо сатум шукемдаш йӧным пуа.