30 августышто Медведево посёлкышто Марий Элым вуйлатыше А.Евстифеев «Теремок» у йочасадым почын.
«Таче, у тунемме ий вашеш, ме у туныктымо тӧнежым почына — кумда, волгыдо йочасадым. Россий президент В.В.Путин каласен, йоча-влаклан дошкольный учрежденийлаште чарак деч посна тунемаш улмо йӧн, элыштына демографий йодышым саемдаш полша. Марий Элыште шинчымаш системым вияҥден колтымаш — республикысе правительствын ыштыме пашаштыже кӱшыл верым налын шога. Тиде ойлымашем яра шомакеш ынже код манын, тачысе кечылан ик примерым кондем: республикысе улыке школышто спорт инвентарьым уэмдымаш кая. Таче ты пашалан Туныктыш министерствылан 6 миллион теҥгем колташ кӱштымашыш кидпалым шынденам», — погынышо воспитатель да ача-ава ончылно регионым вуйлатыше каласыш.
2021 ий мучаш марте Медведево районышто кок йочасад да икте Йошкар-Олаште почылтыт. Тыгак Марий Турек районысо Сардаял школым чоҥен пытарышаш улыт. 2022 ийыште Медведево посёлкышто 825 тунемме веран у школ почылтеш, тыгак Йошкар-Оласе «Юбилейный» микрорайонышто ик у школ омсажым почеш.
Палемдыман, пытартыш ныл ийыште республикыште 15 йочасадым чоҥымо, а Медведево районышто тиду у йочасад — кудымшо.