16 февральыште Москошто Марий Элым Вуйлатыше Ю.Зайцев Российысе «Знание» обществын генеральный директоржо М.Древаль дене вашлийын.
Нуно тӱрлӧ отрасльысе научно-просветительский паша нерген каҥашеныт. А вара Юрий Зайцев ден Максим Древаль ойпидышым подписатленыт. Тидыже калыкын научный, образовательный да культурный шинчымашыжым келгемдаш, тыгак нормативно-правовой базым палаш, у специалист-влакым туныкташ, элнан историйже да сеҥымашыже нерген уверым палдараш полшышаш.
Марий Элым Вуйлатышын мутшо почеш, республикыште илыше-влак Российысе «Знание» обществын эртарыме мероприятийлашкыже чолган ушнат. «Ончыкыжымат пайдале да оҥай сомылым шукташ, дистанционно туныкташ, кызытсе мультимедийностьым илышыш шыҥдараш, самырык талантан специалист-шамычым просвещений пашашке ушаш палемдена. Ойпидыш шинчымашым чарак деч посна налаш да лекций пашам утларак пайдалым ышташ полша манын ӱшанем», – каласен Юрий Зайцев.
«Знание» общество Марий Элыште организацийым уэмдыме деч вара пашам сайын шукта. У проект ден мероприятий-влак эртаралтыт. Гендиректор Максим Древаль у ойпидыш кундемыште илыше-влаклан у йӧным почеш манын.