Госуслугын порталыштыже да приложенийыштыже ынде электронный студенческий билетым да зачётный книжкам оформитлаш лиеш.
Минцифрын палдарымыж почеш, у сервислан кӧра студенческий билет ден зачётный книжка электронный лийыт. Тыге студент улмым пеҥгыдемдаш, тӱрлӧ скидке да льгото дене пайдаланаш йӧн ышталтеш. Тидлан «Образований» разделыш пурыман, студенческий билет приложенийыште QR-код семын ончыкталтеш. Электронный зачётный книжка студентын кузе тунеммыжым эскераш полша. 2025 ий мучаш марте Госуслугысо порталыште ты йӧн эксперимент семын эртаралташ тӱналеш, тушко вузын да студентын келшымыж почеш ушнаш лиеш. Тыгодым электронный документ кагаз документ гаяк праван улеш.