У ий шӱлышан вашлиймаш

Тошто У ий вашеш специальный военный операцийын ветеранже-влак Сергей Никитин ден Павел Паймаков Йӱштӧ Кугызан резиденцийыштыже лийыныт. Моло уна семынак нуным коҥгаште кӱктымӧ мелна ден шудо чай дене вашлийыныт.

Рвезе-влак коктынат Шернур вел Чылдемыр кундем гыч улыт. Сергей Чылдемырыште шочын-кушкын, а Павел – Шым Памаш ялыште.

Сергейын оҥыштыжо кызыт ныл медаль уло. Кажныже сарзыеҥын патырлыкшым утыр пеҥгыдемда. Спецоперацийышке рвезе мобилизаций почеш 2022 ийыште логалын да тушто ик ият шым тылзе тушман ваштареш шоген.

Павел Паймаков Оршанкысе шуко профилян колледжыште физкультурым туныктышылан тунемын, МарГУ-м пытарен. СВО деч ончыч школышто ОБЖ ден физкультурым туныктен. Кызытат Шернурысо 2-шо номеран школышто педагоглан пашам ышта.

Рвезе-влаклан йолташышт, мурызо Саша Иванов ден гармоньчо Алексей Горинов, резиденцийыште икмыняр мурым пӧлекленыт.

Фото: «Марий Эл» ГТРК-н видеожо гыч скрин.