Шушаш идалыкын озаже ТИГР волгыдо тӱсым йӧрата.
Астролог-влак посна Шӱдыр пале йымалан шочшо-влаклан тӱрлӧ тӱсан вургемым чияш темлат. Шорыклан – йошкар але тул тӱсаным, Презылан – ужар але кӱреным, Йыгырлан – нарынчалгым, Раклан – шӧр, бежевый тӱсаным, Левлан – ший тӱсан тувырым але костюмым, Ӱдырлан – волгыдо кандым але волгыдо ужаргым, Висалан – ал тӱсаным, Скорпионлан – чыла тӱсанымат (!), Пикшызылан – шӧртньӧ але ший тӱсаным, Ирказалан – ик тӱсан вургемым, Вӱд йоктарышылан – шӧртнялгым, Коллан – ошалге кандым. Йылгыжше, пайеткан, люрексан куэман вургемат келшен толеш, лачак тигр семын полоско-влак лийшаш огытыл.
Пӧръеҥ-влаклан шем але сур смокинг, ошалге брюко ден волгыдо тӱсан пинчак, ший галстук але бабочке, ош тувыр, тыгак йылгыжше ший але шӧртньӧ пинчакат, ший тӱс дене сӧрастарыме шем вургемат лачеш толыт.
Сӧрастарыме арвер кокла гыч ший келша, тыгак ош тӱсан натуральный кӱ, мутлан, горный хрусталь. Волгыдо вургемлан кӱчым пастельный тӱсаныш чиялтыза. Йолчиемым, кӱчым идалыкын символжо тӱсаным ойыраш лиеш.