У ий – эн вучымо пайрем, очыни. Шукынжо тудым юзо шӱлышанлан шотлат. Южыжо гына «изи годым пайрем гын пайрем ыле, кызыт тыге ок шижалт» пелештен колта.
Теве Элиза тыгак йӧратыме пайремым вуча. Сергей таҥжылан ончычак пӧлекымат ямдылен. «Куана Сергей! Мыняр шонен коштын… Эсогыл телефон ужалыме кевытышкат пырля пуренна. Мыланемже мом пӧлекла гын?» – ушыжым туржын.
У ий деч вич кече ончыч Сергей ден Элиза вашлийыч. «Сергей азапланыше…» – шоналтыш ӱдыр.
– Тыйын чыла сай? Ала-молан тӱсетат вашталтын… – йодо Элиза.
– Сай… Тыгай паша. У ийым пырля вашлийын огына керт. Йӧршын…
– Туштен ит ойло. Ме вет ик ий ончыч лач тиде кечын, У ий деч ончыч, шарнет, вашлийынна? – ындыжым Элиза, тоштын-тоштде, Сергейын чурийышкыже ончаш тырша. Рвезын ӱдыр дек нимогай куан кумылжат уке! Ала Элизалан чыла тиде коеш? Шӱмжат ала-молан пытартыш жапыште «Сергейын тый декет шижмашыже пытен» манын шижтараш тыршен… Ушыж дене гына Элиза Сергейым пыдал налын: «Пашам шуко ышта. Ала мыланем иктаж сай пӧлекым У ийлан ямдыла».
– Могай вара пашат уло? – Элиза йол йымалнысе лумым ончале.
Сергей раш вашештыш:
– Мемнан корнына тӱрлӧ. Мыланем ласка илыш кӱлеш. Чеверын.
– Ласка илыш маннет? – ыш чакне Элиза.
– Ӱдырлан изиш шыпрак лийман огыл мо? – рвезе торжанрак вашештыш. – Пеш тура улат. Шке чыла умылет.
Сергей савырнен ошкыльо. Шеҥгек ончалде. Элиза уремыште шоген кодо. Ик ий ончычсо семынак, лывыла чоҥештылын, лум пырче-влак йогат. Могай леве… Чонлан гына моткоч йӱштӧ лие.
Шинчаончылныжо – Сергей дене вашлийме тат-влак… Икте почеш весе. Теве Йӧратыше-влакын кечыштлан рвезе модыш маскаигым пӧлеклен. А Элизан черле улмыж годым кузе чон вургыжын аптекыш коштын, эмым наледен… Чылажат эртен… «Шижын шӱмем, шижын», – Элиза йӱкынак пелештыш. «Ынде родо-влаклан мом ойлашат ом пале. Могай сай качым муынат манынат шуктеныт. Сӱан нергенат йодышташ тӱҥалыныт. Ялышкат ом кай!» – пытартыш ойжым ӱдыр пеҥгыдын каласыш.
…Кум кече пуйто тӱтыраште эртен. Элиза пашашкат ӱмыл гай коштын. У ийым айлыме пӧлемыште эртараш шонен пыштен. «Коло вич ийымат теменам. Шуко огыл, конешне… Марлан лекташ кызыт кумло ияшат лиеш… Але вара Сергейже тунар чапле? Лӱмжак могай ӱшанлын чучын… А вет Алина йолташ ӱдырем вошт ужмо семын «тыйын олмышто Сергей дек тӱткырак лиям ыле, ала-можо чынла ок чуч» манын ыле. Молан? Икымше вашлиймаштак Сергей, лӱмем пален налмек, «Ала Лиза, ала Эльза» воштылал колтыш». Тыге шонкален, ӱдыр шыде пар лекмыжым шиже. «Мыйже тудлан ала-могай шергакан пӧлекым налынам, коеш. А тудыжо мом пеш пӧлекленже? Маскаигыжым мый пеш ом йӧратыс. А гитар дене шоктымем пален налмек, руал пелештыш: «Тидыже рвезе-влаклан утларак келшен толеш… Тылатше молан кӱлеш?» Шонымаш да шарнымаш мундыра чарныде рончалтеш.
Элиза кужун шонкалыш. «Мыйже молан шкемым тынар лапкаҥдаш пуэнам? Тыгай ӱдыр-влакым шке семынем мыняр шылталенам, а тевыс шкежат… Ушемат йӧршын лийын огыл мо?» – пелештыш семынже.
У ий кечын Элиза ыш чыте да соцкылыш Сергейын лаштыкышкыже пурыш. Шинчажлан ӱшаныде, эше ик гана фотожым лишемдыш: Сергей ала-могай ӱдыр дене пырля шога. Теве молан Сергей сырыше лийын.
Умбакыже — 7 январьысе газетыште.Кевыт
Светлана Муртазина.
Медведево район, Руэм.