Кава гыч лум шыман велеш. Кудывечыште йоча-влак икте-весышт ӱмбаке лумым кышкен модыт. Анна нуным куанен эскера. Кечыгут окна гыч уремышке тыге ончен шогаш ямде. Чонжылан тунар ласка, сай. А эше вашке
У ий шуэш. Ты пайремым Анна поснак йӧрата. Вет Юмо тудлан эн шергакан пӧлекым ыштен — эргым пӧлеклен. Тудат йоча-влак коклаште тӱнӧ юарла. Анна ден марийжын кужу жап йочашт лийын огыл. Врач-влак кидым веле лупшеныт, коктынат таза улыт гынат, Анна мӱшкыраҥын огыл.
Самырык ӱдырамаш ньога-влакым моткоч йӧратен, тудо школышто пашам ыштен, тӱҥалтыш класслам туныктен. Классыштыже Маша ден Саша йыгыр ака-шольо лийыныт. Школышто У ийым пайремлаш ямдылалтыныт. Чылан мотор вургемым чиен толыныт, икте-весылан тӱрлӧ пӧлекым пуэденыт. Ака-шольо гына моткоч шӱлыкын койыныт.
Анна Васильевна нуным шкеж деке ӱжын да мо лийме нерген умылаш тыршен. Нунын авашт пеш чот черланен. Туныктышо У ийлан лишыл еҥже-влаклан пӧлекым наледен. Маша ден Сашам чаманенат, кумылыштым кеч изишак нӧлталаш манын, пӧлекым нунылан кучыктен. Сумкаштыже изирак юмоҥа киен, тудым эре пеленже коштыктен. Ты юмоҥам аваштлан пӧлеклаш каласен, вашкерак паремаш полша манын ӱшандарен. Маша ден Саша пӧлеклан чот куаненыт.
А теле каныш деч вара нунат Анна Васильевналан пӧлекым конденыт. Тиде йыгалт пытыше аистан статуэтке лийын. Анна тудым пачерыштыже вакшыш воктен шогышо тумбычкыш вераҥден. А икмыняр жап гыч мӱшкыран улмыж нерген пален налын.
Чыла тургыжланымаш шеҥгелан кодмыла чучын, аза шочмым гына вучаш. Но вич тылзаш мӱшкыранже годым марийже паша гыч толын да командировкыш шокшо точкыш колтат манын каласен. Военный еҥ ӱчашен ок керт, приказым шуктыман. Аннан кумылжо волен: кузе марийже деч посна ила? Кӱпчыкшӧ мыняр шинчавӱдым ужын!
М а р и й ж ы л а н мӱшкырыштӧ ньоган чумедылмыжым шижаш, мӱшкыран ватыж пелен лияш логалын огыл. Анна воктеке пырысше гына толын да мырлен шинчен.
Кече-влак эртеныт. Азам ышташат жап шуын. Чурий мучко йогышо шинчавӱдым ӱштылын, Анна эмлымверыш тарванен. Марийже трук толын лектеш манын, кагазеш возен коден: «Азам ышташ каенам». А марийже чынжымак вучыдымын толын лектын, сюрпризым ышташ шонен. Кагазеш возымым ужмеке, вигак эмлымверыш куржын. Аннан азам ыштымыжым кечыгут окна йымалне вучен коштын.
19 декабрьыште, Николай Чудотворец кечын, ош тӱняшке эргышт шочын. Тудлан Колюш лӱмым пуэныт. Тиде илыш деч, Юмо деч У ийлан шерге деч шерге пӧлек лийын. А кызыт Анна кокымшо гана ава лияш ямдылалтеш.
Ирина НИКОЛАЕВА.