Александр Таныгин, Марий Эл Респуюликысе юмыйӱла ушемын Тӱҥ онаеҥже.
О, поро дене толын, йӧратен шого, Ош Поро Сандалык Юмына! Ужар шаган кожет дене, ӱстембал чес пайремет дене поро дене толын шого, Идалык Кугу Юмына. Эртен кайыше ийлан, аралтышым, шулыкым, серлагышым перке дене мемнам кодымыжлан поро дене вуйнам савена.
О поро дене толын шого мемнан Пӱрышына. Марий калыклан у идалыкыште пуэн шого поро пӱрымашым !
О поро дене толын шого Мер Кугу Юмына! Йӱла ден йӱла, тӱс ден тӱс, йылме коклаште, калык коклаште пуэн шого поро каҥашым.
О поро дене толын шого Аралтыш Серлагышна! У идалыкыште арален шого кугу тул деч, кугу вӱд деч, кугу мардеж дечын, йот калыкын осал шинчаж деч да тӱнямбал мор дечын.
Иза-шольо, ака-шӱжар, тулар-тулаче-влак! Тендан еш кышкарда эре тӱланен шогыжо. Тендан кинде-шинчалда, ӱстембал чесда пургыжалт шогыжо. Тендан вольыкда-кайыквусыда эре шке игышт дене шӱм-чондам куандарышт, мӱкшотарда шем пылла нӧлталтше, мӱй клатда-амбарда мӱй пуш дене пушланыже. У ий дене! У пиал дене! У куат дене! Эсен-таза те лийза.