Володя Аптулаев, Марий Эл радион вӱдышыжӧ:
– 2020 ий курымешлан ушыштына ик эн неле идалык семын кодеш, очыни. Амалжым чылан палат, уто гана ойлымыжат ок шу. Туге гынат шуко сай, поро, волгыдо шарнымашат чонеш курымешлан иланен.
Кугурак эргым – Яндияр – 1-ше классым тунем лектын, кокымшыш вончыш, баян дене шокташ тунемеш. Изиракше – Онар – шушаш ийын изаж семынак портфельым вачӱмбакыже сакалта, брейк-дансыш шке кумылын кошташ тӱҥалын да тидын дене ача-аважым куандара. Шке нергенем ойлаш гын, мыйынат илышыштем моткоч кугу вашталтыш лийын. Эртыше ий тӱҥалтыште мый паша верем вашталтенам, ынде Марий самырык театрыш корнем такыртем, Марий Эл Радиошкат тӱрлӧ передачым вӱдаш пурен коштам. Кок коллективыштат мыйым поро йолташ семын шотеш налмылан кажнылан кугу таум каласем. 2020 ий, мыйын шонымаште, мемнам чытышнам терген, мемнам аныклаш туныктен, шкем ӧрдыж вел гыч аклен ончалаш таратен. Ешыште умылымаш, вашла полшымаш, ик ой уло гын, кеч-могай нелылыкым сеҥаш лиеш. Тиде еш ласкалыклан мый шке йӧратыме пелашемлан тауштем да кеч-кунамат мыйын тӱҥ эҥертышем улмыжлан мланде марте вуем савем. «Кугарня» газетым лудшо-влакым у 2021 ий дене шокшын саламлем да эн ондак тазалыкым тыланем! Тек шушаш ий эртыше ийын чыла йӧсыжым, тӱрлӧ тӧрсыржым кораҥда. У ийыште у пиалым ом тылане, а улшыжым аралаш, ситыдымыжым ешарен налаш темлем. Пайрем дене!