Анастасия ОТМАХОВА, сӱретче:
– 2020 ийыште мартыште ик жапыштак кок верыште выставкем эртен. С.Г.Чавайн лӱмеш Национальный книгагудышто «Тайны мастерской» ончерем лийын. Тушто тӱрлӧ шонымашан кугу картине ден портрет-влак ончыкталтыныт.
Нунын коклаште – «Спящая», «Весна», «Девушка-птица», тыгак Э.Сапаев лӱмеш опер да балет театрын актрисыже-влак Эльвира Гурьева ден Любовь Добрынинан портретышт. А Национальный президент школышто «Девушка с этюдником» выставкым ончыктышым. Тушко тӱня мучко коштмо годым сӱретлыме паша-влакым чумыренам. Тылеч посна «Марий кундем» выставкыш кок пашамым луктынам. «Моя Майя» радынаште кум ияш ӱдыремым ужыда, а «Куярно» пашаште Медведево районысо Куяр воктенысе кечан пейзажым ончалаш темлем. Чылаштым У ий дене саламлем!