Римма ПАЛЬЦЕВА, спортсменке:
– Мыйын кугу вашталтыш лийын огыл. Ончычсо семынак кажне эрдене кум шагат куржталам, зарядкым ыштем. Вара уныка дене шинчем. Ме канена, модына, кечывалым уремыште яндар южым шÿлена. Кастене уныкам наҥгаят, а мый адак куржталаш лектам.
Пандемий нерген ойлаш гын, мый чер деч ом лÿд. 73 ийыш тошкалынам ынде, но нигунам черланымаш уке. Эмлымверышкыжат таза улмем нерген справкым налаш кÿлмö годым веле коштам.
Мый 31 декабрьыште эре 50 меҥгым куржталам, 1 – январьыште адак тынарымак. Шкемым ончем: кертам але уке. Кертам – тугеже таза улам. Ӱстел коклаште шинчымаш уке.
Шушаш ийыште чылан таза лийышт. Чер пытыже! Южо еҥ вет тений паша деч посна кодын але вес нелылыкым ужын. Тыгай экшыкым У ий тöрлыжö. Кумылда эре сай лийже, ида лÿд, сайлан ÿшаныза. Вашла умылен, пагален илыза. Поснак марий калыклан келшен, ваш эҥертен илыман, шонем. Тыге веле ме виян лийына.