Эрик ЮЗЫКАЙН, М.Шкетан лӱмеш драмтеатрын директоржо:
– 2020 ий нигӧланат куштылго лийын огыл. Шакше черлан кӧра Марий театрланат шуко нелылыкым ужаш логале. Туге гынат «нерым ышна саке», шонен пыштыме спектакль-влакым лукна, Крымысе да Москосо фестивальлашке миен коштна. Тыгак Марий театрын историйыштыже икымше гана «Саликам» вияш эфир дене Интернет гоч ончыктышна. Тиде пашам умбакыжат шуяш шонена, вет шуко марий Йошкар-Ола деч ӧрдыжтӧ: районлаште, регионлаште, йотэллаште – ила. Идалыкым моткоч куандарыше, кугу сеҥымаш паша дене мучашлышна – сценыште кокымшо марий мюзиклым «Ший Пампалчым» лукна. Калыклан спектакль келшыш. Ӱшаныме шуэш: 6, 7 да 21 январьыштат тудым ончаш рӱж погына. Тиде йӧсырак жапыште театрлан эҥертышым пуышо да спектакльвлакым ончышо йолташна-влаклан тау мутым каласена, таза, пиалан лийза. Айста вес ийынат ме пырля лийына.