Андрей Алексеев, актёр:
– 2025 ий шарнымашеш моткоч кугу кышам кода. Тиде ийын мый эмоционально, психологически кушкынам, манаш лиеш. Идалык йӧсӧ лийын гынат, сайже веле ушышко пура. Тиде эн ончычак Марий самырык театр дене Пошкырт кундемыш, Нижнекамск, Уфа, Тольятти олалашке гастрольышко коштмо кече-влак улыт. Ты ийынак кызытсе жаплан ик эн ойыртемалтше паша кокла гыч лӱмлӧ марий поэтнам Колумб рольым модмо пагыт нерген каласыман. А кызыт идалык мучашыште у ошкылым ыштенам: Шкетан лÿмеш Марий драмтеатрыш кусненам. 2025 ийлан моткоч кугу таум каласем. Тудын пагытше мучашыш лишемеш, а ме вес ийыш куанен да у ÿнар дене куснаш мутым пуэна. Таза, пиалан лийза!