Надежда Моисеева, поэтессе:
– Тенийысе ик эн кугу вашталтышлан идалыкат пеле мӧҥгыштӧ йоча дене шинчыме деч вара пашаш лекмым шотлем. Тылеч ончыч Марий Элысе спорт да туризм министерствыште пашам ыштенам гын, кызыт Марий самырык театрыште сылнымут пӧлкам вуйлатем.
Сылнымут дене кылдалтше паша чонемлан моткоч лишыл. Йӧн дене пайдаланен, театрын художественный вуйлатышыже Олег Геннадьевич Иркабаевлан пашаш ӱжмылан да мыланем ӱшанымыжлан тауштем.
Ешыштемат изирак куан лийын: Есения изирак ӱдырна шыжым йочасадыш каен, шукерте огыл тудо кок ийым темен.