Зоя ДУДИНА, поэт, Марий Эл Республикысе тÿвыран сулло пашаеҥже:
– Эртыше идалык тӱнян чер азапше дене эртыш. Чер ыш ончо, кӧ тый улат: изи ма кугу, рвезе ма шоҥго, чинъеҥ але тыглай пашазе – чылаштым ик семын солалтыш. Чаманем серызе Мария Илибаевам, ончычсо кучемьеҥ Анатолий Максимовым, историк Ксенофонт Сануковым… А мо лийын сайже? «Кеҥеж сылнымутчо» проект шочын, да У 2021 ийыште Россий президентын грантше дене утларак куатым налшаш. Шкетан лÿмеш театрыште «Ший Пампалче» мюзикл шындалтын. Веселан пашам ыштенна.
Эрик Юзыкайн ден Роман Алексеев артист-влакым, постановкысо тӱшкам устан ушен моштеныт. Нине проект-влак мылам шочмо мландыште лияш йӧным почыныт – тиде шерге.
У ийыште марий-влаклан куатым, аралтышым, пиалым тыланем.