Кажне еҥ, у идалыкыш тошкалмеке, ончыкылыклан планым чоҥа. Самырык лудшына-шамыч 2026 ийыште мом ыштынешт?
Кирилл Новосёлов, Шернур район:
– У идалыкыште гармоньым эшеат сайын шокташ тунемаш, калык ончыко лекташ, у муро-влакым шочыкташ, сеҥымашыш шуаш палемденам. У верлашке миен толаш, у пашалан пижаш шонымаш уло. Оҥай еҥ-влак дене вашлияш да у йолташ-шамыч дене палыме лияш тореш омыл.
Но чоныштем илыше эн кугу ӱшан – тиде вуй ӱмбалне тыныс кава, калык-влакын вашла пагален да полшен илымышт. Вет ме чылан ласка да пиалан илышым чоҥымо верч тыршена да Юмылан кумалына.
У ий – тиде у шонымаш, у историй, у сеҥымаш, у куан, у пиал, у илыш. Садлан чылалан чытышым, порылыкым, тазалыкым, сеҥымашым тыланем. Аралыза шкендам да лишыл еҥда-шамычым. У 2026 ий дене, йолташ-влак!