Кажне еҥ, у идалыкыш тошкалмеке, ончыкылыклан планым чоҥа. Самырык лудшына-шамыч 2026 ийыште мом ыштынешт?
Полина Максимова, Параньга район:
– Кызыт 10-шо классыште тунемам, садлан йоча да кугыеҥ кокласе ойыртемым шижаш тӱҥалынам. Кугурак лийме дене ыштышаш сомыл ешаралтеш. Садлан, чыла шукташ манын, 2026 ийлан планым чоҥенам. Эн ончыч шкемым могай профессийыште ужам, умылынем. Тидлан тунемме тӧнеж-влакын эртарыме Почмо омса кечылашкышт лектын коштнем.
Ешем тамле кочкыш дене куандараш келша. Садлан у кочкыш рецепт-шамычым шымлаш кумылем уло. Спорт илышыштем кугу верым айла, тудын дене умбакыжат пеҥгыде кылым кучаш шонем. Тыгак лишыл еҥем-шамыч дене иктаж-кушко миен толаш, тора кундемыште илыше йолташем-шамыч дене вашлияш йӧн лектеш гын, сай ыле. Мый ӱшанем, у идалыкыште шонымашем-влак шукталтыт!