Кажне еҥ, у идалыкыш тошкалмеке, ончыкылыклан планым чоҥа. Самырык лудшына-шамыч 2026 ийыште мом ыштынешт?
Юлиана Курочкина, Параньга район:
– 2025 ийыште Йошкар-Оласе Бауман лицей пеленысе медиаклассыште тунемаш тӱҥалынам. Мыланем тиде тыгак ончыкылык профессийым ойырен налмаш, тудлан ямдылалтмаш. Садлан ты йыжыҥыште мастарлыкым вияҥдымылан, ум шымлымылан шукырак жапым ойыраш шонем.
Ме ӱдыр-рвезе-шамыч дене школысо газетым луктына. Тений газетлан лӱмлӧ еҥ-шамыч дене интервьюм ышташ, сай темым ойырен налын, статьям возаш палемденам. Тыгак фото да видеосъёмкым ыштыме шотышто моштымашем вияҥдынем, журналист-шамычлан эртаралтше конкурслаште шкем тергынем. Адакшым тений 11-ше классыш вончем, ончылно – кугыжаныш экзамен. Тудым сайын сдатлаш манын, кыртмен тунемман, шуко лудман, документальный фильм-шамычым ончыман.
Эре тунемме дене веле серлагаш ок лий. Иктаж кундемыш, мутлан, пошкудо олашке, миен толаш сай ыле. Волгоградысе «Родина-мать зовёт» скульптурым ужнем, тыгак тӱрлӧ тоштерым ончал савырнынем. Шукертсек гитар дене шокташ тунемнем. Икманаш, 2026 ийлан шуко планым палемденам. Чоным пыштен, уло вийым погалтен, нине паша-влаклан пижам гын, чыла ыштен сеҥем манын ӱшанем!