Кызыт Российыште аналоговый телевещаний гыч цифровой телевиденийыш куснымо паша кая. Тидын шотышто 31 январьыште Москошто пресс-конференций лийын.
11 февральыште Магадан, Пенза, Рязань, Тула, Ульяновск, Ярославль областьлаште да Чечняште аналоговый передатчикым йӧртымӧ. 15 апрельыште аналоговый вещаний цифровой телевиденийыш 20 регион кусна, а 30 июньышто – моло 57 регион, нунын коклашке Марий Элат пура. Чыла тидыже «Развитие телерадиовещания в РФ на 2009-2018 годы» федеральный целевой программе почеш ышталтеш. У ий вашеш чыла регионышто цифровой телесеть пашам ышташ тӱҥалын. Российыште илыше еҥ-влакын кызыт 20 телеканалым ончаш йӧнышт уло.
Пресс-конференци-йыште Российын цифровой вияҥмаш, связь да массовый коммуникаций министржын алмаштышыже А.Волин каласен: «Ӱмаште 3 декабрьыште аналоговый вещанийым йӧртымӧ пилотный проектым Тверь областьыште илышыш пуртымо. Социальный сетьлаште тидын шотышто шукын шке шонымашыштым возеныт. 1,5 процент еҥлан веле аналоговый вещанийым йӧртымӧ келшен огыл».
«Развитие телерадиовещания в РФ на 2009-2018 годы» федеральный целевой программе почеш 5040 объектым чоҥымо да пашаш колтымо. «11 февральыште шым регионышто цифровой телевиденийыш кусненыт. Телевизорым чӱктымеке, «Первый канал», «Россия-1», НТВ, ТНТ, «Пятый канал», «Рен-ТВ», СТС да «Звезда» телеканал-влакын логотипышт воктене «А» буква уло гын, тугеже аналоговый телевидений ончыкталтеш, да телевизорым «цифровой» приёмыш настроитлаш кӱлеш. Цифровой телевиденийыш куснаш ешартыш оборудований – дециметровый диапазонан антенне – полша. А 2012 ий деч ончыч ыштен лукмо телевизорыш приставкым ушыман», — ойлен «Российысе телевизионный да радиовещательный сеть» ФГУП-ын гендиректоржо А.Романченко.
Цифровой эфирный телевещанийыш молан куснаш кӱлеш?
Российыште илыше чыла еҥ 20 федеральный каналым – икымше мультиплексын телеканалже-влакым («Первый канал», «Россия-1», «Матч ТВ», НТВ, «Пятый канал», «Россия К», «Россия 24», «Карусель», ОТР, «ТВ Центр»» да кокымшо мультиплексын каналже-влакым (Рен-ТВ», «Спас», СТС, «Домашний», ТВ-3, «Пятница», «Звезда», «Мир», ТНТ, «Муз-ТВ») оксам тӱлыде ончен кертеш. Адакшым цифровой телевидений аналоговый деч шулдырак да сайрак качестван, тудо шуко сервысыш пураш йӧным пуа.
Анастасия Эманова.