Марий Элым Вуйлатыше Юрий Зайцевын кӱштымыж почеш Йошкар-Олалан 50 у автобусым налме. Пытартыш кечылаште 15 у автобусым рӱдолашке кондымо. Кодшыжым март мучаш марте конден шуктат.
У транспорт пассажир-влакым шупшыктымо пашам саемдаш, направлений-влакым кумдаҥдаш полшат.
Общественный транспортым саемдыме шотышто Марий Элыште илыше-влак Юрий Зайцев деке ик гана огыл лектыныт. Нуно маршрут такси-влакын графикышт (поснак кастене), шотдымо перевозчик-влакын нарушенийым ыштымышт, оласе микрорайонлаш кудалаш маршрут-влакын укелык шотышто вуйым шийыныт. Сандене Юрий Зайцев ты пашам шотыш кондаш тыршен. Тудын кӱштымыж почеш Марий Эл Республикысе Правительстве Председательын алмаштышыже Александр Сальников у транспорт-влакым ончен лектын.
Автобус кызытсе жаплан келшыше да йӧнан. Тушко 55 еҥ пура. Салонышто еҥ-влаклан шинчаш 17 верым, тыгак кум складной да инвалидлан ик верым ыштыме.
Автобуслаште кондиционер, шокшым пуымо системе пашам ыштат, видеонаблюдений уло. Вашке салонлашке сокыр да начарын ужшо-влаклан «Говорящий город» радиоинформатор системым вераҥдаш шонат. У транспортлаште кондуктор огеш лий.