РФ Президентын Юл кундемысе федеральный округын полномочный представительже И.Комаровын видеоконференций йӧн дене еҥ-влаклан приёмым эртарен. Тушко Марий Элым Вуйлатышат ушнен.
Тыгодым Звенигово районышто илыше Г.Изиляев Кокшайск селаште врачебный амбулаторийым чоҥен шукташ йодын. Кызытсе зданийым 1958 ийыште чоҥымо.
Марий Элым Вуйлатыше увертарен: ты объектым «Модернизация первичного звена здравоохранения» региональный проект почеш шуктат. Тидлан 35,5 млн теҥге ойыралтшаш.
У зданий ик пачашан лиеш, кугытшо – 230 квадратный метр. Кызыт марте 20 процент пашам шуктымо, фундаментым ыштыме, цокольым оптымо.
У амбулаторий 2023 ий декабрьыште пашам тӱҥалшаш.