7-13 июльышто Звенигово олаште Россий кӱкшытан XVII Марий самырык тукым слёт эртаралтеш.
Тудо Кугу Отечественный сарыште сеҥымылан 80 ий теммылан да Шочмо Элым аралышын идалыкшылан пӧлеклалтеш. Слётын шонымашыже, ӱмашсе деч ойыртемже нерген Мер-политике рӱдерын специалистше Галина Алексеевна Ласточкина каласкала.
Тудо манеш:
– Марий самырык тукым слёт республикыштына латшымше гана лиеш. Чыла районышто эртаралтын. Тений слёт ӱдыр-рвезе-шамычым Звенигово олаште чумыра. Участник-влак ӱмашсе дене таҥастарымаште шукырак – шӱдӧ наре еҥ – лийшаш. Марий Эл, Пошкырт кундем, Татарстан Республик, Киров, Свердловск да Пермь вел гыч, Моско, Санкт-Петербург, Челябинск да Тюмень олала гыч участник-шамыч толаш кумылым ончыктеныт. Йодмашым 20 июнь марте mer-kanash@mail.ru электрон адресыш колтыман.
Слёт – тиде погынымаш веле огыл. Тудо марий ӱдыр-рвезе-влак коклаште ончыко вӱден моштышо лидерым кушташ шонымаш дене эртаралтеш. Сандене слётын программыже кумда, поян да виян. Тӱрлӧ мастер-класс, лекций лийыт. Тыгак слётыш толшо-шамычым ятыр каныме мероприятий, экскурсий вучат.
– Тений участник-влак йодмашым колтымо деч посна «Талешке тукым» усталык конкурсыш видеопрезентаций пашам ямдылышаш улыт. Темыже-влак: «Фронтовик», «Тылыште тыршыше» да «Сарын йочаже-влак». Конкурсышто сеҥыше-влакым слёт эртыме годым палемдена, – каласкала Галина Алексеевна. – Слётын пашашкыже «Саскавий» марий ӱдырамаш ушем ушнаш кумылан. Ушемын еҥже-влак участник-шамычлан Кугу Отечественный сарыште ӱдырамашын рольжо нерген каласкалаш шонат.
Слёт Марий Элысе Тӱвыра, печать да калык-влакын пашашт шотышто министерствын, Марий Элысе Молодежный политике комитетын полшымышт дене эртаралтеш. Молгунам эн изи участникын ийготшо 16 ий лийын гын, тений 18-35 ияш ӱдыр-рвезе-влак ушнат. Чылаже 20 еҥан вич лужа лиеш.