21 октябрьыште «Автоледи Марий Эл – 2022» конкурс лиеш. Тудым кажне ийын Йошкар-Оласе ДОСААФ-ын автодромыштыжо эртарат.
Конкурсыш ушнаш шонышо-влак 20 октябрь 17 шагат марте «Автоледи – 2022» тамган серышым rostomari@mail.ru электрон почтыш колтышаш улыт. Тушто фамилийым, лӱмым, ачалӱмым, автомашинан маркыжым, шке шот дене але организаций гоч ушнымым ончыктыман.
Конкурс 10 шагатлан тӱҥалеш. Шке машинада уке гын, Йошкар-Оласе технический рӱдерыште «Калина», «Фабия» автомобиль-влакым пуат. Конкурсыш Марий Элысе кугыжаныш да мер организаций, СМИ, правам аралыше орган да моло структурышто пашам ыштыше ӱдырамаш-влакым ушнаш ӱжыт. Тидлан транспортым вӱдаш праван лийшаш.