21-29 июльышто Самара областьысе Мастрюковский ерласе Фестивальный паркыште Юл кундем федеральный округысо «iВолга» молодёжный форум лиеш. Форумышко ушнаш шонышо-влаклан 26 май марте «Росмолодёжь» платформышто але форумын ivolgaforum.ru официальный сайтыштыже регистрацийым эрташ лиеш.
Тушко 18-35 ияш ӱдыр-рвезе-влак ушнен кертыт. Тений форумын тематикыже Российысе калык-влакын икоян улмышт дене кылдалтын. Тренинг занятий, молодёжный проект-влак шотышто конкурс, шанче да практике конференций, мастер-класс, вуз-влак коклаште таҥасымаш-влак, эксперт-влак дене вашлиймаш да молат лийыт. Участник-влак 8 профильный сменан образовательный программыште шинчымашым налыт.