20 апрельыште Йошкар-Олаште С.Г.Чавайн лӱмеш Калыкле книгагудышто «Библионочь – 2024» акций эртаралтеш. Тудо Ешын идалыкше дене кылдалтын, «Уло ешге лудына» маналтеш.
Акций 18 шагат гыч 22 шагат марте шуйна. Кажне кумылан еҥ тушко миен кертеш. Кӧн лудмо билетше уке, тудым пӧлек шотеш пуат. Кугыеҥ да йоча-шамычлан каныме программым ыштыме: усталык мастер-класс, художественный мастерской, тӱрлӧ номер, палыме еҥ-влак дене вашлиймаш, экскурсий да молат. Еҥ-шамыч модмашке, конкурслашке, викторинылашке, лотерейыш ушнен, караоке почеш мурен, кушташ тунемын, ончерлам ончен кертыт.