Моско ола воктенысе Клин олаште «Клинское подворье» Российысе икымше У ий модыш тоштер да кумдан палыме «Ёлочка» У ий модыш фабрике пашам ыштат.
Тоштерыште 12 зал уло. Нуно Клин мландыште янда промыселын иланымыже да вияҥмыже нерген каласкалат. Клин уездысе Круговской волостьышто икымше янда производство шочын. Тушто лампым, тӱрлӧ кленчам ямдыленыт. Тысе янда да хрусталь дене ыштыме кочмо арвер уло Российыште палыме лийын. Ожно янда завод воктенысе яллаште илыше кресаньык-влак янда дене шерым ышташ тунемыныт. Садлан ик залыште тыглай ялысе мастарын паша верже ончыкталтын.
Кожым сӧрастарыме йӱла да историй поян. Ондак кожым шере кочкыш, олма, пӱкш дене сӧрастареныт. Индустриализаций жапыште У ий модышым утларакшым мамык, картон дене ыштеныт. 1940-60 ийлаште орден, шӱдыр, СССР символикан, самолёт да дирижабль форман модышым лукмо. Жап эртымек, янда модыш-влакым утларак кучылташ тӱҥалме. «Ёлка» фабрикын кызытсе жапысе модышыжо-влакымат ужаш лиеш.
Тоштерыште 10 метр кӱкшытан кож воктеч шогалде нигӧ эртен огеш кай. Пушеҥгылан шке шонымашым каласаш гын, лишыл жапыште тудо шукталтеш, маныт.