Кажне озаватын шке чапле рецептше уло. Лудшына-влак тутло мелнам кузерак кӱэштыт?
Галина Якушева, Звенигово район:
– Коҥгаште кӱэштме мелнан тамжым нимо дене таҥастараш огеш лий. Тувыртыш вӱдым левед вӱд дене варем. Тушко шинчалым, сакырложашым, рум, манный шӱрашым пыштем да сайын лугем. Изишак шинчыктем. Овараш тӱҥалмыж деч ончыч ик кӱчымӧ пареҥгым тёрко гоч нӱжен колтем да кушкыл ӱйым ешарем. Руаш оварген кӱзымеке, кӱэшташ тӱҥалам веле. Коҥга гыч лукмо мелнам кок могырымат ушкал ӱй дене сайын йыгем.
Ольга Сергеева, Кужэҥер район:
– Мый Агытансола гыч Клавдия Куклинан рецептше почеш ыштем. Икымше лончылан руашым 1 стакан вӱд, 3-4 стакан уржа ложаш, шинчал да 1 кугу совла ушкал ӱй дене ямдылена. Пеҥгыдын нӧштылына да тыртышым, вичкыж комым ыштен, кажныжым посна тул ваштареш кӱктена. Кокымшо лончылан руашым 1 стакан тувыртышвӱд, ру, 3 стакан шыдаҥ ложаш, 1 кугу совла сакырложаш, шинчал, пел стакан ушкал ӱй дене лугена. Тудо вишкыдырак шуктымо руаш гай лийшаш. Кӱктен лукмо ком ӱмбаке кокымшо лончылан ямдылыме вишкыде руашым йыгена да, коҥгашке чыкен, пеле кӱчымӧ марте кучена. Кумшо лончылан тыгыде шӱрашым ӱмбалан шӧрыштӧ ончылгоч лӧчыктарена. Тушко шинчалым да сакырложашым пыштена. Ямде вартышыш муно ден ӱйым ешарена. Тудым пеле кӱчымӧ мелна ӱмбаке шарена да коҥгаш чыкена.