манеш мотор марий ӱдыр Татьяна Подбойкина.
Тудо Санкт-Петербургышто кок ий наре ила, тусо ик школышто физикым туныкта.
Татьяна Морко район Кокласола гыч. Ачажат, аважат школышто пашам ыштат. Ачаже – Марий Эл Республикын сулло туныктышыжо В.А.Подбойкин. Ӱдыр изинек туныктышын пашажым ужын кушкын. Но изиж годым туныктышо лияш кумылжо лектын огыл.
– Школышто математике ден физике урок-влакым йӧратенам, – манеш Татьяна. – Ик жап военный лияш шоненам. Но варажым тиде паша ӱдырлан келшен ок тол манын шоналтышым. Тыге школ деч вара МарГУ-ш физико-математический факультетыш тунемаш пуренам, физик специальностьым ойырен налынам. Тунам школышто пашам ышташ тӱҥалам манын, шоналтенат омыл. Но илыш корно тыге савыралын.
Санкт-Петербург ола Татьяналан школышто тунеммыж годымак келшен. Тиде олаште ик гана лиймек, чонжылан ласкан чучын, тышке эре толмыжо шуын. Университетым тунем пытарымекыже, Санкт-Петербургыш каяш йӧн лектын.
У олаште паша верым кужун кычалаш логалын огыл: лач кеҥеж лийын, вашке у тунемме ий тӱҥалшаш улмаш. Шуко шонкалыде, ӱдыр тусо ик школышто физикым туныктышылан пашам ышташ тӱҥалын.
– Кугу ола, йоча-влак дене тылеч ончыч пашам ыштен омыл ыле, тӱҥалтышлан тургыжланаш логалын, – ойла Татьяна Валерьевна. – Но мый шке виемлан ӱшаненам. Эркын тиде профессийлан тунем шуынам. Кызыт 7-9-ше класслаште физикым туныктем. Йоча-влак пеш тыршат. Огыт умыло гын, йодыштыт, уроклан ямдылалтыт. Туныктышо лияш куштылго огыл, но тиде профессий моткоч кӱлешан. Мом шке палет – йоча-влаклан пуэт, нуным кумылаҥдет.
Жап лийме годым ӱдыр бассейныш коштеш, спортзалыште капкылжым вияҥда. Тиде олаште Татьянан йолташыже-влак улыт, нунын дене вашлийын жапым эртара. Кызыт самырык туныктышо паша опытым эше пога гына. Ончыкыжым магистратурыш тунемаш пураш шона, тиде аланыште у кӱкшытыш шунеже. Тудын ойлымыж почеш, йоча-влак дене пашам ышташ куштылго огыл, но ӱдыр-рвезе-влакын тунемаш кумылыштым ужатат, эшеат тыршен пашам ышташ вий лектеш.
– Санкт-Петербургым шукын пылан, йӱран игечан ола манын шонат. Но тиде моткоч мотор вер. Мыланем тыште йолын кошташ пеш келша. Йӱран игечыштат Санкт-Петербург моткоч сылне, тыште вес семын шӱлалтеш, — манеш Т.Подбойкина. – Петропавловский крепость гыч Нева эҥерым ончен шогаш йӧратем. Невский проспектыште лияш келша. Тиде олаште моткоч шуко сад ден парк верланеныт. Шошым гын ола пеледалтеш да эшеат сӧрал лиеш. Тиде пагытыште кече утларак шыратен ончымо гай чучеш.