Звенигово район Эсмекпляк селаште шочын-кушшо Людмила Куницына ынде кум ий наре Санкт-Петербург олаште ила да пашам ышта. Ӱдырын ойлымыж почеш, икымше гана тушто лиймекак, тиде ола чонжым савырен.
Людмила тыглай пашазе ешыште кушкын: аваже Надежда Ивановна – кондитер, ачаже Александр Геннадьевич Татарстан Руспублик Зеленодольск оласе ик заводышто контролёрлан тырша. 9-ше класс марте ӱдыр шке селасе школышто тунемын. Классым вуйлатыше да марий йылме ден литературым туныктышо Любовь Викторовна Максимовалан шочмо йылмым эшеат чот йӧраташ кумылаҥдымыжлан ӱдыр кызытат кугу таум каласа. Людмила изинек спортлан шӱман, тӱрлӧ таҥасымаште школын чапшым арален. Тидлан физкультурым туныктышо Василий Арсентьевич Белкинлан таушта. Тыгак Л.Куницына «Юнта» театральный кружокыш коштын, вуйлатыше Лариса Викторовна Краснова дене пырля шуко мероприятийлан сценке-влакым ямдыленыт.
Индеш классым пытарымеке, Людмила Йошкар-Оласе медколледжыш тунемаш пурен. Тудын Анастасия акажат медшӱжарлан тушто тунемын. Ты профессий кӱлешан, паша вер эре лиеш. Людмила чолга студентке лийын, спорт таҥасымашлаште колледжын чапшым арален. Тунемме деч вара куштылго атлетике секцийыш, тренажёр залыш, бассейныш коштын.
– Верыште шинчаш ом йӧрате, каныш жапат пайдале лийже манын шонем, – манеш Л.Куницына. – Колледжым тунем пытарымеке, Йошкар-Оласе пӱйым эмлыме ик частный клиникыште пашам ышташ тӱҥальым. Медицинын тиде аланже мыланем поснак келша. Тӱрлӧ специалист дене тыршен шуктенам, кажныжын пашаже ойыртемалтше. Йошкар-Олаште кум ий наре пашам ыштымеке, Санкт-Петербург олаш илаш куснышым: «комфорт зоно» манме гыч лекташ да шкем умбакыже шуараш кумыл лектын. У верыш илаш куснымо, у еҥ-влак дене палыме лийме шуын. Ешем тидын шотышто полшен гына. Тылеч ончыч Санкт-Петербургышто ик гана гына лийынам ыле. Но кӱчык жапат ты верым йӧратен шындаш да тиде «мыйын олам» манын умылаш ситен. Питер – кугу ола, тунамак тушто мӧҥгысӧ гай сай. Финский залив да олан архитектуржо кумылым савырат. Кеҥежым йӱдшӧ-кечыже волгыдо, тыгай годым паша деч вара мом гына ыштен шукташ ок лий! Сутка 24 шагат деч кужунрак пуйто шуйна, «илаш» жап утларак пуалтеш гай чучеш. Санкт-Петербургыш илаш куснымекем, вес олаш толынам манын шоналтын огыл, тудо мыйым пуйто вученак.
Людмилан ойлымыж почеш, Санкт-Петербургышто илыш условий куандара, пашадарат сай. Тудо ик частный клиникыште пӱйым эмлыше врачын
полышкалышыжлан ышта. «Пашаште коллективна моткоч сай, ик кугу еш гай улына. Врачын ассистентше – кӱлешан профессий, тый дечет
пациентым эмлыме жап кужун шуйна але уке, кабинетысе атмосфер, арулык шогат», – манеш Людмила.
Кум ийыште ӱдыр олам сайынак пален шуктен. Тӱҥалтыште кажне каныш кечын ола дене «палыме лийын». Кызытат яра жап улмо годым тусо мотор верлам ончен савырна. Спорт нергенат ок мондо: бассейныш, фитнесыш коштеш. Тоштерыш, театрыш, ончерыш миен толеш. Профессийже келша гынат, кызыт эше ик профессийлан заочно тунемеш. «Илыш дене тӧр ошкылман», – палемда тудо.
Марий Элыш Людмила идалыклан 2-3 гана ача-аваж деке толын кая. Эше тудо тӱрлӧ мотор верыште лияш йӧрата. Пытартыш жапыште, мутлан, Калининград олаш да Дагестан Республикыш миен толын.
Л.Куницынан альбомжо гыч налме фото.