Тений 10 октябрьыште Волжский район Сотнур селасе рӱдӧ клуб пелен СВО-лан пӧлеклалтше тоштерым почмо.
Тушто ты район гыч Украиныште спецоперацийым шуктышыла илыш дене чеверласыше 16 рвезын фотожым вераҥдыме. Кажне кечын манме гай тушко тӱрлӧ школ гыч тунемше-влак экскурсий дене толыт. Теве 16 ноябрыште тиде тоштерыш Карай ден Мамасево школла гыч тунемше-влак миеныт.
Волжский районышто тиде икымше тыгай тоштер. Ик велне СВО-што колышо-влакын фотоштым вераҥдыме, илыш корнышт нерген кӱчыкын возымо. Вес вере Украинышке СВО-шко гуманитарный полышым колтышо чолга еҥ-влакын портретыштым ончыктымо.
Тоштер 11 шагат гыч 16 шагат марте пашам ышта. Тушко еҥ-влак чӱчкыдын пурен лектыт. Тӱрлӧ школ гыч толшо тунемше-влаклан экскурсийым ты тоштерым вуйлатыше В.В.Печникова эртара.
– Украиныште эртаралтше спецоперацийыште шуко рвезын ӱмыржӧ кӱрылтеш. Сандене Волжский районысо тӱвыра пӧлкам вуйлатыше-влак тоштерым почаш темленыт да тидлан полышым пуэныт.
Тыгак нине рвезе, пӧръеҥ-влакын медальыштым, йӧратыме вургемыштым чумыренна. Чыла тидым ача-ава-влак конден пуэныт.
Тоштерын посна стендыштыже СВО-н кузе тӱҥалмыж нерген возенна. Тидын дене кылдалтше плакат-влакым пуртенна.
Кызытеш тыште Корамас, Сотнур, Шарача, Мамасево, Упшер, Памар школла гыч ик класс дене лийыныт. Ынде кугурак классла дене пырля уэш толын каят. Теве 16 ноябрьыште тоштерыште Карай школ гыч 6-шо классыште тунемше 15 йоча да Мамасево школ гыч 5-ше ден 6-шо класслаште тунемше 25 икшыве лийыныт. Лишыл кечылаште эше шукын толшаш улыт.
Тиде тоштерыш пурен шогалмеке, чон пеш коршта, фото-влакым шинчавӱд деч посна ончашат огеш лий. Сандене Украиныште военный спецопераций вашкерак пытыже манын шонена. Сайлан гына ӱшанен илена, – мане Сотнур клубым вуйлатыше Р.Степанова.
16 ноябрьыште Сотнур тӱвыра пӧртыштӧ икмыняр мероприятий лийын. Руш Шайра ял гыч почеламутым возкалыше Людмила Александрован лекше кудымшо почеламут сборникше лӱмеш вашлиймашым эртарыме. А Карай школышто тунемше-влак спектакльым ончыктеныт.
Сотнур селасе рӱдӧ тӱвыра пӧртыштӧ кызыт икмыняр выставке пашам ышта. Тушто пушеҥгым мастарын пӱчкеден моштышо, тӱрлӧ пу арверым ыштылше, крючок дене пидше кидмастар ден тыгак йоча-влакын пашаштым ончыктымо.
Тыгай тоштер тачысе илышлан келшыше, кӱлешан. Боецым, элнан патриотшо-влакым кушкын толшо тукым умбакыжат шарнен илаш тӱҥалеш. Нуно Шочмо элым лӱдде араленыт, тыныслык верч пеҥгыдын шогеныт.